Sep – 22 – கண்ணீர்!

“இயேசு கண்ணீர் விட்டார்” (யோவான் 11:35). ஆங்கில வேதாகமத்தில் மிகச்சிறிய வசனம் இந்த வசனம் தான். இதில் ‘Jesus wept’ என்ற இரண்டு வார்த்தைகளே அடங்கியுள்ளன. கர்த்தருடைய அன்பும் மனதுருக்கமும் அவருடைய கண்களிலிருந்து கண்ணீரை வரவழைக்கிறது. ஒரு ஊழியர் அடிக்கடி ஒரு பாடலைப் பாடுவதுண்டு. “எனக்காய் கதறும் என் இயேசு நல்லவரே” என்ற உருக்கமான பாடலே அது. இயேசுவின் குணாதிசயங்களில் அவருடைய மனதுருக்கம் இருதயத்தைத் தொடுகிறது. வேதம் சொல்லுகிறது, “கர்த்தர் கிருபையும் நீதியுமுள்ளவர், நம்முடைய தேவன் மனஉருக்கமானவர்” (சங்கீதம் 116:5). புதிய ஏற்பாட்டில் அவர் ஒவ்வொரு அற்புதத்தை செய்யும்போதும் மனதுருகி அதைச் செய்தார் என அறியலாம். ஆம், அவர் மனதுருக்கமானவர். குஷ்டரோகிகளைக் கண்டபோதும், வியாதியஸ்தர்களைக் கண்டபோதும் அவர் மனதுருகினார். மேய்ப்பனில்லாத ஆடுகளைப் போன்ற மக்களைக் கண்டபோது மனதுருகினார். மரித்துப்போன நாயீனூர் விதவையின் மகனுடைய சடலத்தைக் கண்டபோது மனதுருகினார். அவருடைய அன்பு மனதுருக்கத்தோடு நின்றுவிடவில்லை. அற்புதத்தையும் செய்தது. பல வேளைகளில் நீங்கள் மனதுருகுகிறீர்கள். உங்களுக்கு அருமையானவர்கள் யாராவது மரித்துவிட்டால் மற்றவர்களெல்லாம் அழும்போது, உங்களுடைய கண்களும் கண்ணீர் வடிக்கின்றன. அவர்களுடைய துயரத்திலே நீங்களும் பங்கு பெற்று அழுகிறீர்கள். திருவள்ளுவர், “அன்புக்கும் உண்டோ அடைக்குந்தாழ் ஆர்வலர் புன்கணீர் பூசல் தரும்” என்று குறிப்பிடுகிறார். அன்பினால் கண்ணீர் வடிகிறது. இயேசுவைப் பாருங்கள். அவர் தேவாதி தேவன் கர்த்தாதி கர்த்தர். வானத்தையும் பூமியையும் உண்டாக்கினவர். அவருடைய கண்களிலிருந்து கண்ணீர் வழிகிறதென்றால், அது எத்தனை மனதுருக்கமாய் இருக்கும் என்பதை சிந்தித்துப் பாருங்கள். தேவதூதர்கள் அழுவதுமில்லை; கண்ணீர் சிந்துவதுமில்லை. ஆனால் உங்களைப்போல மாம்சமும் இரத்தமுடைய இயேசுகிறிஸ்து கண்ணீர் சிந்துகிறதினால் அவர் உங்களுடைய சகோதரன், சிநேகிதன், உங்களுடைய நேசர் என்பதை நீங்கள் உணர்ந்துகொள்ள முடியும். பரலோக தேவனுடைய மனதுருக்கத்தை அவர் கண்ணீரின் மூலமாக வெளிப்படுத்திக் காண்பித்தார். இயேசு உங்களுக்காக மனதுருகி கண்ணீர் விடுகிறது மாத்திரமல்ல, உங்களுடைய பாடுகளையும், நெருக்கங்களையும் கூட தானே தன்னுடைய சரீரத்தில் அனுபவித்து கண்ணீர் விடுகிறார். சவுல் என்ற வாலிபன் இளம் விசுவாசிகளை துன்பப்படுத்த சென்றபோது கர்த்தர் வழியிலே குறுக்கிட்டு, “சவுலே, சவுலே என்னை ஏன் துன்பப்படுத்துகிறாய்?” என்று கேட்டார். பாருங்கள் உங்களுடைய எல்லா துக்கத்திலும், துயரத்திலும் பங்கு பெறுகிற அருமை ஆண்டவர் எத்தனை மனதுருக்கமானவர்! தேவபிள்ளைகளே, கண்ணீர் சிந்துகிற இயேசுவினுடைய மனதுருக்கம் உங்களுடைய உள்ளத்தில் இருக்குமென்றால், நீங்களும் ஆத்துமாக்களுக்காக அழுவதற்கு ஏதுவாயிருக்கும் கிறிஸ்துவின் மனதுருக்கம் உங்கள்மேல் கடந்து வரும்படி நீங்கள் ஜெபிப்பீர்களா? நினைவிற்கு :- “அவர் மாம்சத்திலிருந்த நாட்களில், தம்மை மரணத்தினின்று இரட்சிக்க வல்லமையுள்ளவரை நோக்கி, பலத்த சத்தத்தோடும் கண்ணீரோடும் விண்ணப்பம் பண்ணினார்…” (எபி. 5:7).
Article by elimchurchgospel

Leave a comment